ud8.9:0.1Udāna 8.9
ud8.9:0.2Paṭhamadabbasutta
ud8.9:1.1Evaṁ me sutaṁ—
ud8.9:1.2ekaṁ samayaṁ bhagavā rājagahe viharati veḷuvane kalandakanivāpe.
ud8.9:1.3Atha kho āyasmā dabbo mallaputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud8.9:1.4Ekamantaṁ nisinno kho āyasmā dabbo mallaputto bhagavantaṁ etadavoca:
ud8.9:1.5“parinibbānakālo me dāni, sugatā”ti.
ud8.9:1.6“Yassadāni tvaṁ, dabba, kālaṁ maññasī”ti.
ud8.9:2.1Atha kho āyasmā dabbo mallaputto uṭṭhāyāsanā bhagavantaṁ abhivādetvā padakkhiṇaṁ katvā vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbāyi.
ud8.9:3.1Atha kho āyasmato dabbassa mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi.
ud8.9:3.2Seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi;
ud8.9:3.3evamevaṁ āyasmato dabbassa mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masīti.
ud8.9:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.9:5.1“Abhedi kāyo nirodhi saññā,
ud8.9:5.2Vedanā sītibhaviṁsu sabbā;
ud8.9:5.3Vūpasamiṁsu saṅkhārā,
ud8.9:5.4Viññāṇaṁ atthamāgamā”ti.
ud8.9:5.5Navamaṁ.