ud8.8:0.1Udāna 8.8
ud8.8:0.2Visākhāsutta
ud8.8:1.1Evaṁ me sutaṁ—
ud8.8:1.2ekaṁ samayaṁ bhagavā sāvatthiyaṁ viharati pubbārāme migāramātupāsāde.
ud8.8:1.3Tena kho pana samayena visākhāya migāramātuyā nattā kālaṅkatā hoti piyā manāpā.
ud8.8:1.4Atha kho visākhā migāramātā allavatthā allakesā divā divassa yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud8.8:1.5Ekamantaṁ nisinnaṁ kho visākhaṁ migāramātaraṁ bhagavā etadavoca:
ud8.8:2.1“Handa kuto nu tvaṁ, visākhe, āgacchasi allavatthā allakesā idhūpasaṅkantā divā divassā”ti?
ud8.8:2.2“Nattā me, bhante, piyā manāpā kālaṅkatā.
ud8.8:2.3Tenāhaṁ allavatthā allakesā idhūpasaṅkantā divā divassā”ti.
ud8.8:2.4“Iccheyyāsi tvaṁ, visākhe, yāvatikā sāvatthiyā manussā tāvatike putte ca nattāro cā”ti?
ud8.8:2.5“Iccheyyāhaṁ, bhagavā, yāvatikā sāvatthiyā manussā tāvatike putte ca nattāro cā”ti.
ud8.8:3.1“Kīvabahukā pana, visākhe, sāvatthiyā manussā devasikaṁ kālaṁ karontī”ti?
ud8.8:3.2“Dasapi, bhante, sāvatthiyā manussā devasikaṁ kālaṁ karonti;
ud8.8:3.3navapi, bhante …
ud8.8:3.4aṭṭhapi, bhante …
ud8.8:3.5sattapi, bhante …
ud8.8:3.6chapi, bhante …
ud8.8:3.7pañcapi, bhante …
ud8.8:3.8cattāropi, bhante …
ud8.8:3.9tīṇipi, bhante …
ud8.8:3.10dvepi, bhante, sāvatthiyā manussā devasikaṁ kālaṁ karonti.
ud8.8:3.11Ekopi, bhante, sāvatthiyā manusso devasikaṁ kālaṁ karoti.
ud8.8:3.12Avivittā, bhante, sāvatthi manussehi kālaṁ karontehī”ti.
ud8.8:4.1“Taṁ kiṁ maññasi, visākhe, api nu tvaṁ kadāci karahaci anallavatthā vā bhaveyyāsi anallakesā vā”ti?
ud8.8:4.2“No hetaṁ, bhante.
ud8.8:4.3Alaṁ me, bhante, tāva bahukehi puttehi ca nattārehi cā”ti.
ud8.8:5.1“Yesaṁ kho, visākhe, sataṁ piyāni, sataṁ tesaṁ dukkhāni;
ud8.8:5.2yesaṁ navuti piyāni, navuti tesaṁ dukkhāni;
ud8.8:5.3yesaṁ asīti piyāni, asīti tesaṁ dukkhāni;
ud8.8:5.4yesaṁ sattati piyāni, sattati tesaṁ dukkhāni;
ud8.8:5.5yesaṁ saṭṭhi piyāni, saṭṭhi tesaṁ dukkhāni;
ud8.8:5.6yesaṁ paññāsaṁ piyāni, paññāsaṁ tesaṁ dukkhāni;
ud8.8:5.7yesaṁ cattārīsaṁ piyāni, cattārīsaṁ tesaṁ dukkhāni,
ud8.8:5.8yesaṁ tiṁsaṁ piyāni, tiṁsaṁ tesaṁ dukkhāni;
ud8.8:5.9yesaṁ vīsati piyāni, vīsati tesaṁ dukkhāni,
ud8.8:5.10yesaṁ dasa piyāni, dasa tesaṁ dukkhāni;
ud8.8:5.11yesaṁ nava piyāni, nava tesaṁ dukkhāni;
ud8.8:5.12yesaṁ aṭṭha piyāni, aṭṭha tesaṁ dukkhāni;
ud8.8:5.13yesaṁ satta piyāni, satta tesaṁ dukkhāni;
ud8.8:5.14yesaṁ cha piyāni, cha tesaṁ dukkhāni;
ud8.8:5.15yesaṁ pañca piyāni, pañca tesaṁ dukkhāni;
ud8.8:5.16yesaṁ cattāri piyāni, cattāri tesaṁ dukkhāni;
ud8.8:5.17yesaṁ tīṇi piyāni, tīṇi tesaṁ dukkhāni;
ud8.8:5.18yesaṁ dve piyāni, dve tesaṁ dukkhāni;
ud8.8:5.19yesaṁ ekaṁ piyaṁ, ekaṁ tesaṁ dukkhaṁ;
ud8.8:5.20yesaṁ natthi piyaṁ, natthi tesaṁ dukkhaṁ, asokā te virajā anupāyāsāti vadāmī”ti.
ud8.8:6.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.8:7.1“Ye keci sokā paridevitā vā,
ud8.8:7.2Dukkhā va lokasmimanekarūpā;
ud8.8:7.3Piyaṁ paṭiccappabhavanti ete,
ud8.8:7.4Piye asante na bhavanti ete.
ud8.8:8.1Tasmā hi te sukhino vītasokā,
ud8.8:8.2Yesaṁ piyaṁ natthi kuhiñci loke;
ud8.8:8.3Tasmā asokaṁ virajaṁ patthayāno,
ud8.8:8.4Piyaṁ na kayirātha kuhiñci loke”ti.
ud8.8:8.5Aṭṭhamaṁ.