ud8.7:0.1Udāna 8.7
ud8.7:0.2Dvidhāpathasutta
ud8.7:1.1Evaṁ me sutaṁ—
ud8.7:1.2ekaṁ samayaṁ bhagavā kosalesu addhānamaggappaṭipanno hoti āyasmatā nāgasamālena pacchāsamaṇena.
ud8.7:1.3Addasā kho āyasmā nāgasamālo antarāmagge dvidhāpathaṁ.
ud8.7:1.4Disvāna bhagavantaṁ etadavoca:
ud8.7:1.5“ayaṁ, bhante, bhagavā pantho;
ud8.7:1.6iminā gacchāmā”ti.
ud8.7:1.7Evaṁ vutte, bhagavā āyasmantaṁ nāgasamālaṁ etadavoca:
ud8.7:1.8“ayaṁ, nāgasamāla, pantho;
ud8.7:1.9iminā gacchāmā”ti.
ud8.7:2.1Dutiyampi kho …pe…
ud8.7:2.2tatiyampi kho āyasmā nāgasamālo bhagavantaṁ etadavoca:
ud8.7:2.3“ayaṁ, bhante, bhagavā pantho;
ud8.7:2.4iminā gacchāmā”ti.
ud8.7:2.5Tatiyampi kho bhagavā āyasmantaṁ nāgasamālaṁ etadavoca:
ud8.7:2.6“ayaṁ, nāgasamāla, pantho;
ud8.7:2.7iminā gacchāmā”ti.
ud8.7:2.8Atha kho āyasmā nāgasamālo bhagavato pattacīvaraṁ tattheva chamāyaṁ nikkhipitvā pakkāmi:
ud8.7:2.9“idaṁ, bhante, bhagavato pattacīvaran”ti.
ud8.7:3.1Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṁ pattañca bhindiṁsu saṅghāṭiñca vipphālesuṁ.
ud8.7:3.2Atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud8.7:3.3Ekamantaṁ nisinno kho āyasmā nāgasamālo bhagavantaṁ etadavoca:
ud8.7:3.4“idha mayhaṁ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṁ, pattañca bhindiṁsu, saṅghāṭiñca vipphālesun”ti.
ud8.7:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.7:5.1“Saddhiṁ caramekato vasaṁ,
ud8.7:5.2Misso aññajanena vedagū;
ud8.7:5.3Vidvā pajahāti pāpakaṁ,
ud8.7:5.4Koñco khīrapakova ninnagan”ti.
ud8.7:5.5Sattamaṁ.