ud8.4:0.1Udāna 8.4
ud8.4:0.2Catutthanibbānapaṭisaṁyuttasutta
ud8.4:1.1Evaṁ me sutaṁ—
ud8.4:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud8.4:1.3Tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti.
ud8.4:1.4Tedha bhikkhū aṭṭhiṁ katvā manasi katvā sabbaṁ cetaso samannāharitvā ohitasotā dhammaṁ suṇanti.
ud8.4:2.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud8.4:3.1“Nissitassa calitaṁ, anissitassa calitaṁ natthi.
ud8.4:3.2Calite asati passaddhi,
ud8.4:3.3passaddhiyā sati nati na hoti.
ud8.4:3.4Natiyā asati āgatigati na hoti.
ud8.4:3.5Āgatigatiyā asati cutūpapāto na hoti.
ud8.4:3.6Cutūpapāte asati nevidha na huraṁ na ubhayamantarena.
ud8.4:3.7Esevanto dukkhassā”ti.
ud8.4:3.8Catutthaṁ.