ud4.8:0.1Udāna 4.8
ud4.8:0.2Sundarīsutta
ud4.8:1.1Evaṁ me sutaṁ—
ud4.8:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud4.8:1.3Tena kho pana samayena bhagavā sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ.
ud4.8:1.4Bhikkhusaṅghopi sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ.
ud4.8:1.5Aññatitthiyā pana paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṁ.
ud4.8:2.1Atha kho te aññatitthiyā paribbājakā bhagavato sakkāraṁ asahamānā bhikkhusaṅghassa ca yena sundarī paribbājikā tenupasaṅkamiṁsu; upasaṅkamitvā sundariṁ paribbājikaṁ etadavocuṁ:
ud4.8:2.2“ussahasi tvaṁ, bhagini, ñātīnaṁ atthaṁ kātun”ti?
ud4.8:2.3“Kyāhaṁ, ayyā, karomi?
ud4.8:2.4Kiṁ mayā na sakkā kātuṁ?
ud4.8:2.5Jīvitampi me pariccattaṁ ñātīnaṁ atthāyā”ti.
ud4.8:3.1“Tena hi, bhagini, abhikkhaṇaṁ jetavanaṁ gacchāhī”ti.
ud4.8:3.2“Evaṁ, ayyā”ti kho sundarī paribbājikā tesaṁ aññatitthiyānaṁ paribbājakānaṁ paṭissutvā abhikkhaṇaṁ jetavanaṁ agamāsi.
ud4.8:4.1Yadā te aññiṁsu aññatitthiyā paribbājakā:
ud4.8:4.2“vodiṭṭhā kho sundarī paribbājikā bahujanena abhikkhaṇaṁ jetavanaṁ gacchantī”ti.
ud4.8:4.3Atha naṁ jīvitā voropetvā tattheva jetavanassa parikhākūpe nikkhipitvā yena rājā pasenadi kosalo tenupasaṅkamiṁsu; upasaṅkamitvā rājānaṁ pasenadiṁ kosalaṁ etadavocuṁ:
ud4.8:4.4“yā sā, mahārāja, sundarī paribbājikā; sā no na dissatī”ti.
ud4.8:4.5“Kattha pana tumhe āsaṅkathā”ti?
ud4.8:4.6“Jetavane, mahārājā”ti.
ud4.8:4.7“Tena hi jetavanaṁ vicinathā”ti.
ud4.8:5.1Atha kho te aññatitthiyā paribbājakā jetavanaṁ vicinitvā yathānikkhittaṁ parikhākūpā uddharitvā mañcakaṁ āropetvā sāvatthiṁ pavesetvā rathiyāya rathiyaṁ siṅghāṭakena siṅghāṭakaṁ upasaṅkamitvā manusse ujjhāpesuṁ:
ud4.8:6.1“Passathāyyā samaṇānaṁ sakyaputtiyānaṁ kammaṁ.
ud4.8:6.2Alajjino ime samaṇā sakyaputtiyā dussīlā pāpadhammā musāvādino abrahmacārino.
ud4.8:6.3Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti.
ud4.8:6.4Natthi imesaṁ sāmaññaṁ, natthi imesaṁ brahmaññaṁ.
ud4.8:6.5Naṭṭhaṁ imesaṁ sāmaññaṁ, naṭṭhaṁ imesaṁ brahmaññaṁ.
ud4.8:6.6Kuto imesaṁ sāmaññaṁ, kuto imesaṁ brahmaññaṁ?
ud4.8:6.7Apagatā ime sāmaññā, apagatā ime brahmaññā.
ud4.8:6.8Kathañhi nāma puriso purisakiccaṁ karitvā itthiṁ jīvitā voropessatī”ti.
ud4.8:7.1Tena kho pana samayena sāvatthiyaṁ manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti:
ud4.8:8.1“Alajjino ime samaṇā sakyaputtiyā dussīlā pāpadhammā musāvādino abrahmacārino.
ud4.8:8.2Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti.
ud4.8:8.3Natthi imesaṁ sāmaññaṁ, natthi imesaṁ brahmaññaṁ.
ud4.8:8.4Naṭṭhaṁ imesaṁ sāmaññaṁ, naṭṭhaṁ imesaṁ brahmaññaṁ.
ud4.8:8.5Kuto imesaṁ sāmaññaṁ, kuto imesaṁ brahmaññaṁ?
ud4.8:8.6Apagatā ime sāmaññā, apagatā ime brahmaññā.
ud4.8:8.7Kathañhi nāma puriso purisakiccaṁ karitvā itthiṁ jīvitā voropessatī”ti.
ud4.8:9.1Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁsu.
ud4.8:9.2Sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
ud4.8:10.1“Etarahi, bhante, sāvatthiyaṁ manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti:
ud4.8:10.2‘alajjino ime samaṇā sakyaputtiyā dussīlā pāpadhammā musāvādino abrahmacārino.
ud4.8:10.3Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti.
ud4.8:10.4Natthi imesaṁ sāmaññaṁ, natthi imesaṁ brahmaññaṁ.
ud4.8:10.5Naṭṭhaṁ imesaṁ sāmaññaṁ, naṭṭhaṁ imesaṁ brahmaññaṁ.
ud4.8:10.6Kuto imesaṁ sāmaññaṁ, kuto imesaṁ brahmaññaṁ?
ud4.8:10.7Apagatā ime sāmaññā, apagatā ime brahmaññā.
ud4.8:10.8Kathañhi nāma puriso purisakiccaṁ karitvā itthiṁ jīvitā voropessatī’”ti.
ud4.8:11.1“Neso, bhikkhave, saddo ciraṁ bhavissati sattāhameva bhavissati. Sattāhassa accayena antaradhāyissati.
ud4.8:11.2Tena hi, bhikkhave, ye manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti, te tumhe imāya gāthāya paṭicodetha:
ud4.8:12.1‘Abhūtavādī nirayaṁ upeti,
ud4.8:12.2Yo vāpi katvā na karomi cāha;
ud4.8:12.3Ubhopi te pecca samā bhavanti,
ud4.8:12.4Nihīnakammā manujā paratthā’”ti.
ud4.8:13.1Atha kho te bhikkhū bhagavato santike imaṁ gāthaṁ pariyāpuṇitvā ye manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti te imāya gāthāya paṭicodenti:
ud4.8:14.1“Abhūtavādī nirayaṁ upeti,
ud4.8:14.2Yo vāpi katvā na karomi cāha;
ud4.8:14.3Ubhopi te pecca samā bhavanti,
ud4.8:14.4Nihīnakammā manujā paratthā”ti.
ud4.8:15.1Manussānaṁ etadahosi:
ud4.8:15.2“akārakā ime samaṇā sakyaputtiyā, nayimehi kataṁ, sapantime samaṇā sakyaputtiyā”ti.
ud4.8:15.3Neva so saddo ciraṁ ahosi. Sattāhameva ahosi. Sattāhassa accayena antaradhāyi.
ud4.8:16.1Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavato etadavocuṁ:
ud4.8:17.1“Acchariyaṁ, bhante, abbhutaṁ, bhante.
ud4.8:17.2Yāva subhāsitañcidaṁ, bhante, bhagavatā:
ud4.8:17.3‘neso, bhikkhave, saddo ciraṁ bhavissati. Sattāhameva bhavissati. Sattāhassa accayena antaradhāyissatī’ti.
ud4.8:17.4Antarahito so, bhante, saddo”ti.
ud4.8:18.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud4.8:19.1“Tudanti vācāya janā asaññatā,
ud4.8:19.2Sarehi saṅgāmagataṁva kuñjaraṁ;
ud4.8:19.3Sutvāna vākyaṁ pharusaṁ udīritaṁ,
ud4.8:19.4Adhivāsaye bhikkhu aduṭṭhacitto”ti.
ud4.8:19.5Aṭṭhamaṁ.