ud4.9:0.1Udāna 4.9
ud4.9:0.2Upasenasutta
ud4.9:1.1Evaṁ me sutaṁ—
ud4.9:1.2ekaṁ samayaṁ bhagavā rājagahe viharati veḷuvane kalandakanivāpe.
ud4.9:1.3Atha kho āyasmato upasenassa vaṅgantaputtassa rahogatassa paṭisallīnassa evaṁ cetaso parivitakko udapādi:
ud4.9:1.4“lābhā vata me, suladdhaṁ vata me,
ud4.9:1.5satthā ca me bhagavā arahaṁ sammāsambuddho;
ud4.9:1.6svākkhāte camhi dhammavinaye agārasmā anagāriyaṁ pabbajito;
ud4.9:1.7sabrahmacārino ca me sīlavanto kalyāṇadhammā;
ud4.9:1.8sīlesu camhi paripūrakārī;
ud4.9:1.9susamāhito camhi ekaggacitto;
ud4.9:1.10arahā camhi khīṇāsavo;
ud4.9:1.11mahiddhiko camhi mahānubhāvo.
ud4.9:1.12Bhaddakaṁ me jīvitaṁ, bhaddakaṁ maraṇan”ti.
ud4.9:2.1Atha kho bhagavā āyasmato upasenassa vaṅgantaputtassa cetasā cetoparivitakkamaññāya tāyaṁ velāyaṁ imaṁ udānaṁ udānesi:
ud4.9:3.1“Yaṁ jīvitaṁ na tapati,
ud4.9:3.2maraṇante na socati;
ud4.9:3.3Sa ve diṭṭhapado dhīro,
ud4.9:3.4sokamajjhe na socati.
ud4.9:4.1Ucchinnabhavataṇhassa,
ud4.9:4.2santacittassa bhikkhuno;
ud4.9:4.3Vikkhīṇo jātisaṁsāro,
ud4.9:4.4natthi tassa punabbhavo”ti.
ud4.9:4.5Navamaṁ.