ud5.1:0.1Udāna 5.1
ud5.1:0.2Piyatarasutta
ud5.1:1.1Evaṁ me sutaṁ—
ud5.1:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud5.1:1.3Tena kho pana samayena rājā pasenadi kosalo mallikāya deviyā saddhiṁ uparipāsādavaragato hoti.
ud5.1:1.4Atha kho rājā pasenadi kosalo mallikaṁ deviṁ etadavoca:
ud5.1:1.5“atthi nu kho te, mallike, kocañño attanā piyataro”ti?
ud5.1:2.1“Natthi kho me, mahārāja, kocañño attanā piyataro.
ud5.1:2.2Tuyhaṁ pana, mahārāja, atthañño koci attanā piyataro”ti?
ud5.1:2.3“Mayhampi kho, mallike, natthañño koci attanā piyataro”ti.
ud5.1:3.1Atha kho rājā pasenadi kosalo pāsādā orohitvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho rājā pasenadi kosalo bhagavantaṁ etadavoca:
ud5.1:4.1“Idhāhaṁ, bhante, mallikāya deviyā saddhiṁ uparipāsādavaragato mallikaṁ deviṁ etadavocaṁ:
ud5.1:4.2‘atthi nu kho te, mallike, kocañño attanā piyataro’ti?
ud5.1:4.3Evaṁ vutte, mallikā devī maṁ etadavoca:
ud5.1:4.4‘natthi kho me, mahārāja, kocañño attanā piyataro.
ud5.1:4.5Tuyhaṁ pana, mahārāja, atthañño koci attanā piyataro’ti?
ud5.1:4.6Evaṁ vutte, ahaṁ, bhante, mallikaṁ deviṁ etadavocaṁ:
ud5.1:4.7‘mayhampi kho, mallike, natthañño koci attanā piyataro’”ti.
ud5.1:5.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud5.1:6.1“Sabbā disā anuparigamma cetasā,
ud5.1:6.2Nevajjhagā piyataramattanā kvaci;
ud5.1:6.3Evaṁ piyo puthu attā paresaṁ,
ud5.1:6.4Tasmā na hiṁse paramattakāmo”ti.
ud5.1:6.5Paṭhamaṁ.