ud5.2:0.1Udāna 5.2
ud5.2:0.2Appāyukasutta
ud5.2:1.1Evaṁ me sutaṁ—
ud5.2:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud5.2:1.3Atha kho āyasmā ānando sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
ud5.2:1.4“acchariyaṁ, bhante, abbhutaṁ, bhante.
ud5.2:1.5Yāva appāyukā hi, bhante, bhagavato mātā ahosi, sattāhajāte bhagavati bhagavato mātā kālamakāsi, tusitaṁ kāyaṁ upapajjī”ti.
ud5.2:2.1“Evametaṁ, ānanda, appāyukā hi, ānanda, bodhisattamātaro honti.
ud5.2:2.2Sattāhajātesu bodhisattesu bodhisattamātaro kālaṁ karonti, tusitaṁ kāyaṁ upapajjantī”ti.
ud5.2:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud5.2:4.1“Ye keci bhūtā bhavissanti ye vāpi,
ud5.2:4.2Sabbe gamissanti pahāya dehaṁ;
ud5.2:4.3Taṁ sabbajāniṁ kusalo viditvā,
ud5.2:4.4Ātāpiyo brahmacariyaṁ careyyā”ti.
ud5.2:4.5Dutiyaṁ.