ud6.10:0.1Udāna 6.10
ud6.10:0.2Uppajjantisutta
ud6.10:1.1Evaṁ me sutaṁ—
ud6.10:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud6.10:1.3Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
ud6.10:1.4Ekamantaṁ nisinno kho āyasmā ānando bhagavantaṁ etadavoca:
ud6.10:2.1“Yāvakīvañca, bhante, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvarapiṇḍapātasenāsanagilānapaccayabhesajjaparikkhārānaṁ.
ud6.10:2.2Yato ca kho, bhante, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṁ.
ud6.10:2.3Bhagavāyeva dāni, bhante, sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ, bhikkhusaṅgho cā”ti.
ud6.10:3.1“Evametaṁ, ānanda, yāvakīvañca, ānanda, tathāgatā loke nuppajjanti arahanto sammāsambuddhā tāva aññatitthiyā paribbājakā sakkatā honti garukatā mānitā pūjitā apacitā lābhino cīvarapiṇḍapātasenāsanagilānapaccayabhesajjaparikkhārānaṁ.
ud6.10:3.2Yato ca kho, ānanda, tathāgatā loke uppajjanti arahanto sammāsambuddhā atha aññatitthiyā paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṁ.
ud6.10:3.3Tathāgatova dāni sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ, bhikkhusaṅgho cā”ti.
ud6.10:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud6.10:5.1“Obhāsati tāva so kimi,
ud6.10:5.2Yāva na unnamate pabhaṅkaro;
ud6.10:5.3Sa verocanamhi uggate,
ud6.10:5.4Hatappabho hoti na cāpi bhāsati.
ud6.10:6.1Evaṁ obhāsitameva takkikānaṁ,
ud6.10:6.2Yāva sammāsambuddhā loke nuppajjanti;
ud6.10:6.3Na takkikā sujjhanti na cāpi sāvakā,
ud6.10:6.4Duddiṭṭhī na dukkhā pamuccare”ti.
ud6.10:6.5Dasamaṁ.
ud6.10:7.0Tassuddānaṁ
ud6.10:7.1Āyujaṭilavekkhaṇā,
ud6.10:7.2tayo titthiyā subhūti;
ud6.10:7.3Gaṇikā upāti navamo,
ud6.10:7.4uppajjanti ca te dasāti.
ud6.10:7.5Jaccandhavaggo chaṭṭho.