ud6.9:0.1Udāna 6.9
ud6.9:0.2Upātidhāvantisutta
ud6.9:1.1Evaṁ me sutaṁ—
ud6.9:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud6.9:1.3Tena kho pana samayena bhagavā rattandhakāratimisāyaṁ abbhokāse nisinno hoti telappadīpesu jhāyamānesu.
ud6.9:2.1Tena kho pana samayena sambahulā adhipātakā tesu telappadīpesu āpātaparipātaṁ anayaṁ āpajjanti, byasanaṁ āpajjanti, anayabyasanaṁ āpajjanti.
ud6.9:2.2Addasā kho bhagavā te sambahule adhipātake tesu telappadīpesu āpātaparipātaṁ anayaṁ āpajjante, byasanaṁ āpajjante, anayabyasanaṁ āpajjante.
ud6.9:3.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud6.9:4.1“Upātidhāvanti na sāramenti,
ud6.9:4.2Navaṁ navaṁ bandhanaṁ brūhayanti;
ud6.9:4.3Patanti pajjotamivādhipātakā,
ud6.9:4.4Diṭṭhe sute itiheke niviṭṭhā”ti.
ud6.9:4.5Navamaṁ.