ud6.8:0.1Udāna 6.8
ud6.8:0.2Gaṇikāsutta
ud6.8:1.1Evaṁ me sutaṁ—
ud6.8:1.2ekaṁ samayaṁ bhagavā rājagahe viharati veḷuvane kalandakanivāpe.
ud6.8:1.3Tena kho pana samayena rājagahe dve pūgā aññatarissā gaṇikāya sārattā honti paṭibaddhacittā;
ud6.8:1.4bhaṇḍanajātā kalahajātā vivādāpannā aññamaññaṁ pāṇīhipi upakkamanti, leḍḍūhipi upakkamanti, daṇḍehipi upakkamanti, satthehipi upakkamanti.
ud6.8:1.5Te tattha maraṇampi nigacchanti maraṇamattampi dukkhaṁ.
ud6.8:2.1Atha kho sambahulā bhikkhū pubbaṇhasamayaṁ nivāsetvā pattacīvaramādāya rājagahaṁ piṇḍāya pāvisiṁsu.
ud6.8:2.2Rājagahe piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
ud6.8:2.3Ekamantaṁ nisinnā kho te bhikkhū bhagavantaṁ etadavocuṁ:
ud6.8:3.1“Idha, bhante, rājagahe dve pūgā aññatarissā gaṇikāya sārattā paṭibaddhacittā;
ud6.8:3.2bhaṇḍanajātā kalahajātā vivādāpannā aññamaññaṁ pāṇīhipi upakkamanti, leḍḍūhipi upakkamanti, daṇḍehipi upakkamanti, satthehipi upakkamanti.
ud6.8:3.3Te tattha maraṇampi nigacchanti maraṇamattampi dukkhan”ti.
ud6.8:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud6.8:5.1“Yañca pattaṁ yañca pattabbaṁ, ubhayametaṁ rajānukiṇṇaṁ, āturassānusikkhato.
ud6.8:5.2Ye ca sikkhāsārā sīlabbataṁ jīvitaṁ brahmacariyaṁ upaṭṭhānasārā, ayameko anto.
ud6.8:5.3Ye ca evaṁvādino:
ud6.8:5.4‘natthi kāmesu doso’ti, ayaṁ dutiyo anto.
ud6.8:5.5Iccete ubho antā kaṭasivaḍḍhanā, kaṭasiyo diṭṭhiṁ vaḍḍhenti.
ud6.8:5.6Etete ubho ante anabhiññāya olīyanti eke, atidhāvanti eke.
ud6.8:5.7Ye ca kho te abhiññāya tatra ca nāhesuṁ, tena ca nāmaññiṁsu, vaṭṭaṁ tesaṁ natthi paññāpanāyā”ti.
ud6.8:5.8Aṭṭhamaṁ.