ud7.1:0.1Udāna 7.1
ud7.1:0.2Paṭhamalakuṇḍakabhaddiyasutta
ud7.1:1.1Evaṁ me sutaṁ—
ud7.1:1.2ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
ud7.1:1.3Tena kho pana samayena āyasmā sāriputto āyasmantaṁ lakuṇḍakabhaddiyaṁ anekapariyāyena dhammiyā kathāya sandasseti samādapeti samuttejeti sampahaṁseti.
ud7.1:2.1Atha kho āyasmato lakuṇḍakabhaddiyassa āyasmatā sāriputtena anekapariyāyena dhammiyā kathāya sandassiyamānassa samādapiyamānassa samuttejiyamānassa sampahaṁsiyamānassa anupādāya āsavehi cittaṁ vimucci.
ud7.1:3.1Addasā kho bhagavā āyasmantaṁ lakuṇḍakabhaddiyaṁ āyasmatā sāriputtena anekapariyāyena dhammiyā kathāya sandassiyamānaṁ samādapiyamānaṁ samuttejiyamānaṁ sampahaṁsiyamānaṁ anupādāya āsavehi cittaṁ vimuttaṁ.
ud7.1:4.1Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.1:5.1“Uddhaṁ adho sabbadhi vippamutto,
ud7.1:5.2Ayaṁhamasmīti anānupassī;
ud7.1:5.3Evaṁ vimutto udatāri oghaṁ,
ud7.1:5.4Atiṇṇapubbaṁ apunabbhavāyā”ti.
ud7.1:5.5Paṭhamaṁ.